Адам ағзасында тамақ қорытылып, артық су, зиянды заттар үнемі сыртқа шығарылып отырады. Бұл жұмысты зәр шығару жүйесі реттейді. Зәр шығару мүшелеріне бүйрек, несепағар, қуық жатады. Бүйрек – үрмебұршаққа ұқсас жұп мүше. Оның негізгі қызметі – қанды зиянды заттардан тазартып, зәр түзу. Бүйректің сыртқы жағы дөңес, ішкі жағы ойыс болып келеді. Ойыс жағында несепағар орналасады. Несепағар – түтікше тәрізді мүше. Бүйректе түзілген зәр осы несепағар арқылы қуыққа өтеді. Қуық – іші қуыс, бұлшықетті мүше. Қуықта зәр уақытша жиналады, кейін несеп өзегі арқылы сыртқа шығады. Зәрдің ағзадан дер кезінде шығарылмауы адам денсаулығына зиян келтіреді.

    Адам ағзасындағы зиянды заттар зәр арқылы шығарылатынын білесің. Керексіз заттар ағзадан одан басқа жолмен де шығарылады. Адам терлеген кезде ағзадан су мен артық тұздар тері арқылы шығарылады. Ал тыныс алу жүйесі жұмысының нәтижесінде көмірқышқыл газ шығарылады.