Пингвиндердің Оңтүстік жартышарды мекен етуі олардың суыққа бейімделуіне ғана байланысты емес. Пингвин тек Антарктиданы ғана емес, кейбір түрі Аустралия, Жаңа Зеландия, Африка мен Америка жағалауын мекен етеді. Пингвиннің тек Оңтүстік жартышарды мекендеуі ғылым үшін де әлі жұмбақ. Барлық түсініктеме әзірге болжам ғана. Қазақстан Солтүстік жартышарда, сондықтан пингвин біздің елімізді мекендемейді.

    Жануардың тіршілік ортасына бейімделуін сырт белгісінен байқауға болады. Құрлықты мекен ететін жануарлардың денесі жүнмен қапталады. Мұндай жамылғы оларды ыстықтан немесе суықтан қорғайды. Құрлықты мекендейтіндердің көбі жылдам жүгіре алады, кейбірі денесімен жорғалап қозғалады. Құстардың сүйегі жеңіл әрі қанаты болғандықтан әуеде қалықтап ұша алады. Денесін қаптаған қауырсыны биіктегі суық ауадан қорғайды. Сулы ортадағы құстардың саусақтарының арасында жүзу жарғақтары болады. Ұшпайтын құстар да кездеседі. Мысалы, құрлықта мекендейтін түйеқұстар ұша алмаса да, жылдам жүгіруге бейімделген. Кейбір жануарлар, мысалы, шұбалшын топырақта тіршілік етеді. Олардың көбінің көзі болмайды. Шұбалшын шіріген қалдықтармен қоректеніп, ирелеңдеп қозғалуға бейімделген. Жауын жауғанда топырақта ауа жетіспегеннен жер бетіне шығады. Су жануарларының көбінде суықта тоңдырмайтын қалың май қабаты болады.