Жануарлар мен өсімдіктер Жер шарының барлық аймағында тіршілік етеді. Жануарлардың тіршілік ортасына бейімделуіне қарай тек сол ортаға ғана тән қоректік тізбек түрлері болады. Жалпақ жапырақты және аралас ормандарда жайылымдық қоректік тізбек кең таралған. Мұндай тізбектің алғашқы буынын алуан түрлі шөп, жидек, ағаш қабығы, жаңғақ пен бүршіктер құрайды. Оның келесі буынын өсімдікқоректілерден елік, бұлан, бұғы, тиін, тышқан, қояндар жалғастырады. Оларды әдетте түлкі, қасқыр, сусар, ақкіс, сілеусін, үкі сияқты жыртқыштар аулап жейді.

    Қылқан жапырақты орманға күн сәулесі аз түседі, әрі ылғал мол болады. Сондықтан оның қоректік тізбегінің бірінші буынын мүк, қына, бұталар құрайды. Оларды қорек ететін өсімдікқоректілер тізбектегі екінші буынды құрайды. Мысалы, бұғы делік. Тізбектің келесі буыны – жыртқыш жануар, яғни аю болуы мүмкін. Қоректік тізбек құруда ағзалардың тіршілік ортасының ерекшелігі мен қоректену түрі ескеріледі.

    Жануарлардың қорегі әртүрлі болғандықтан, қоректік тізбегі де бірнеше түрлі болады. Бір жануар бірнеше қоректік тізбекке қатысуы мүмкін. Оның қоректік тізбектерін біріктірсе, қоректік торы құрылады. Қоректік тор қоректің жетпеуінен бұзылады.  Мысалы, маса құрып кетсе, оны қорек ететін жануарлар қорексіз қалып, жойыла бастайды. Одан басқа ауаның, судың ластануы да қоректік тізбектің бұзылуына әкеп соғады.