Ғарыш кеңістігі мен жұлдыздар ғаламды құрайды. Жұлдыздар бұл кеңістікте ретсіз орналаспайды. Олар бірігіп Галактиканы құрайды. Түнгі аспаннан көрінетін жұлдыздың бәрі біздің Галактикамызға жатады. Оны Құс жолы деп атайды. Жай көзбен қарағанда Құс жолы ақшыл жолақ болып көрінеді. Ал егер дүрбі не телескоп арқылы қарасақ, мыңдаған жұлдызды көрер едік. Біздің Галактикамыз шамамен 100 миллиард жұлдыздан, шаң-тозаң мен газдардан, магниттік өрістен, ғарыш денелері мен ғарыш сәулелерінен тұрады. Оның пішіні дискіге ұқсайды. Біздің Галактика басқа галактикалар сияқты ғарыш кеңістігінде айналып жүреді. Ол спираль тәрізді галактикаға жатады. Сырттай қарағанда ол айналып тұрған отшашуға ұқсайды.

    Аспан денелерінің бәрінің дерлік пішіні шар тәрізді. (Ай, Күн, ғаламшарлар). Ғалымдар бұл әлемдік тартылыс күші – гравитация әсерінен деп ойлайды. Барлық денелер бір-біріне тартылады. Дене неғұрлым үлкен болған сайын ол шар тәрізді бола бастайды.